Әлемдердің Раббысы Алла Тағалаға сансыз мақтаулар мен мадақтар болып, Пайғамбарымыз Мұхаммедке (с.ғ.с.) жанұясына, сүйікті сахабаларына және оларға ізгілікте ерген барша момын мұсылмандарға Жаратушы Иеміздің сансыз салауаты мен сәлемі болғай!

Адамдардың ішіндегі ең жамандарына келетін болсақ, олардың бір тобы екі жүзді адамдар. Екіжүзділік – адам бойындағы ең жағымсыз қасиеттердің бірі. Ең қорқыныштысы екіжүзділік құлшылық кезінде қылаң берсе. Яғни, жүрекпен иман келтірмей, тек сыртқа өзін тақуа етіп көрсету. Бұл адамның өз-өзін ғана емес, Алла Тағаланы мазақ қылғаны.  Мұнафиқ мұсылман ортасында мұсылман сияқты әрекет етіп, кәпірлердің ортасына барғанда күпірлігін жалғастыра береді. Олардың мақсаты сырт көзге мұсылман көрініп, мұсылмандарды іштей ыдырату, алауыздық тудыру, бүлік шығару. Мұнафиқ жүрегіне әлі иман толық ұяламаған, іштен шыққан жау сыяқты. Мұндай екіжүзді имансыз кісілер адамдарды алдағанымен, бүкіл әлемнің жаратушысы Ұлы Алланы алдай алмайды. Алайда барлық шындық ашылатын күн туады. Сол кезде әркім тиісті жазасын алады. Алла Тағала жүректегіні білуші. Пайғамбарымыз (с.ғ.с.): «Адамдардың ішіндегі жамандары мыналарға бір бетімен, ал мыналарға басқа бір бетімен келетін екі жүзділерді табасыңдар»,-деп екі жүзді адамдардан болмауды ескертеді. Алла Тағала екіжүзділердің қандай адам екендігін «Мұнафиқун» сүресінде кеңінен баян етеді. Мұнафиқ ақиқатында кәпір болғандықтан ақыретте тозақта мәңгілік қалады. Бұл ақиқат. Өйткені Құранда: «Негізінен Мұнафиқтар тозақтың ең төменгі қабатында болады. Әрі оларға ешбір көмекші таба алмайсың», – делінеді.

«Шексіз Алла Мұнафиқтар мен кәпірлерді бір тұтас тозаққа жинаушы».

«Мұнафиқ ерлер мен әйелдер бір-біріне ұқсайды. Олар жамандыққа бұйырып, игіліктен тосады. Сондай-ақ олар сараңдық етеді. Олар Алланы ұмытқандықтан Алла та оларды ұмытты. Расында Мұнафиқтар фасық кісілер».

«Мұхаммед (с.ғ.с.) Мұнафиқтарға өздеріне негізінен күйзелтуші азап бар екендігін сүйіншіле» делінген. Мұнафиқтың белгісі жайлы хадисте: Абдулла бин Амр (р.а.) риуаят етеді Пайғамбарымыз (с.ғ.с.) : «Кімнің бойында төрт белгі болса, нағыз екіжүзді (мұнафиқ). Ал, осы төртеуінің бірі табылса одан арылмайынша кісіде екіжүзділіктің нышаны болғаны, ол: аманатқа қиянат етеді, сөйлегенде өтірік айтады, сертін бұзады және дауласса арамдыққа барады» , – деп екіжүзділіктің белгісін айқындап берген .  

Тағы бір хадисінде Пайғамбарымыз (с.ғ.с.) былай дейді: «Маған мына алты нәрсе үшін кепілдік беріңдер, мен де сендерге жәннатқа кіруге кепілдік берейін:

– Сөйлегенде шындықты айтыңдар;

– Уәделеріңді орындаңдар;

– Аманатқа сенімді болыңдар;

– Ұятты жерлеріңді сақтаңдар;

– Көздеріңді харамға жұмыңдар;

– Қолдарыңды харамнан аулақ ұстаңдар» .

Хадистен ұғынғанымыздай бұл белгілер адам бойынан табылса – екіжүзділіктің нышаны.

Алла Тағала баршамызды адамдардың жаманы болудан сақтап, өзімен өзгелерге тек пайдасын тигізетін жақсылардан болуға нәсіп етсін! Әмин!

Көксу аудандық «Балпық би» мешітінің

баспасөз қызметі