Ислам діні өз қанатын жайғанға дейін мұсылмандар күніне 2 уақыт: таңертең жəне кешке намаз оқитын. Алла Тағаланың 5 уақыт намазын парыз еткенге дейін олар беттерін Құдыстағы Ақса мешітіне қарай бұрып оқып жүрді. Алла Тағала Пайғамбарымыз (ол кісіге Алланың игілігі мен сəлемі болсын) сахабаларымен Мəдинаға хижрет еткенде де құбыланы Ақса мешіті етіп қалдыра берді. Пайғамбар жүзін Ақсаға қарай қаратқанда Мекке Құбыласы оның артында қалған еді. Бұл оның жүрегіне қатты батты. Тағы бір себеп, яһудилердің: "Мұхаммед пен оның сахабалары біз көрсеткенше құбыланың қайда екенін де білмейтін", - деген тиіп-қашты сыпсыңдары да арқаларына аяздай батқан. Аллаһ Елшісі құбыланы өзгерту үшін уаһидің түсуін, Жəбірейіл періштенің келуін күтіп, Қағбаны құбыла етуді тілеп Аллаға жалбарына түскен. Күндердің күні Жәбірейіл келіп, Аллаһ Расулы оған көңіліндегі ниетін білдіреді. Сонда періштенің айтқан ақылы мынау: "Мен де сен сияқты құлмын. Сен Жаратқан Аллаға сиынып, содан сұра. Не тілегің болса Раббыңнан тіле!" Осы кездесуден соң Хазіреті Расулаллаһ Құдыстағы Ақса мешітіне жүзін бұрып намазға тұрған сәтте басын көтеріп, көкке ұзақ көз тігетін, дұға ететін. Алла Тағаланың мейірімінің шексіздігі соншалық Пайғамбардың дұғасы қабыл болды.
Пайғамбарымыз (ол кісіге Алланың игілігі мен сəлемі болсын) бесін намазының 2-ші ракəъатын оқып жатқанда, Жəбірейіл келіп құбыланың өзгергені жайлы айтады, сөйтіп Пайғамбарымыз (оған Алланың игілігі мен сəлемі болсын) жүзін қалған 2 ракəъатты Қағбаға қарай бет бұрды, сахабалар да бет бұрып барлығы жаңа құбылаға қарап намаздарын жалғастырды. Бұл бетбұрыс екіжүзділер үшін, əсіресе яһудейлер үшін ауыр соққы болды. Тіпті кейбір иманы əлсіз мұсылмандар күдіктеніп, бұрыс жолға түсіп кетті. Бұндай өзгерісті екіжүзділер Пайғамбардың өз шешімі əрі Оның қателігі деп жар салды. Себебі олардың басты мақсаты шынайы мүминдерді адасушылыққа апару. Яһудейлер айтуынша, өлгендердің барлығы бетін Ақсаға қаратқан болатын, онда олар адасушылықта болды деп шу көтерді. Құбыланың өзгеруі жайлы жəне оның өзіндік ғибратын Алла Тағала Қасиетті құранның Бақара сүресінде баяндайды: Адамдардың кейбір ақымақтары: «Оларды, қарап тұрған құбласынан не нәрсе бұрды?»,- дейді. (Мұхаммед Ғ.С.) оларға: «Шығыс та батыс та Аллаға тән. Ол, қалағанын тура жолға салады » де. (142) Осылайша сендерді (артық, кемсіз) орташа бір үммет қылдық. Адамдарға куә болуларың сондай-ақ пайғамбардың сендерге куә болуы үшін. Қарап тұрған құблаңды, теріс бағынатын біреулерден пайғамбарға ілесетін кісілерді білуге істеген едік. Әрине бұл, Алла, тура жолға салғандардан басқаға қиынырақ. Алла имандарыңды жоймайды. Күдіксіз Алла, адам баласына өте жұмсақ ерекше мейірімді. (143) (Мұхаммед Ғ.С.) жүзіңнің көкке жөнелгенін көреміз. Сондықтан өзің разы болған қыблаға айналдырамыз. Енді жүзіңді «Мəсжид Харам» жаққа бұр. (Мүміндер) қай жерде болсаңдар да: Жүздеріңді сол жаққа жөнелтіңдер. Расында өздеріне кітап берілгендер, негізінен құбланың ауысуын Раббыларынан бір шындық екенін біледі. Алла олардың істегендерінен ғапыл емес. (144)
Қаратал ауданының бас имамы Булекбаев Е. А.
