МӘДИНА ҚАЛАСЫНА ҚОНЫС АУДАРУ
Меккеде құрайыштық мүшріктер тарапынан мұсылмандарға қарсы алуан түрлі азап пен қуғын-сүргін қатты күшейген кезде Пайғамбар (с.а.с.) иман келтіргендерге діндерін сақтап, оны әрі қарай таратулары үшін Мәдина (Ясриб) қаласына көшуге рұқсат береді. Ең бірінші мүһәжір (қоныс аударушы) Әбу Сәләмә еді. Қоныс аудару негізінен сақтық ретінде астыртын, жасырын жүреді. Тек Омар ибн Хаттаб қана жария түрде көшеді. Мұсылмандардың басым көпшілігі көшіп, Меккеде бір-екі мұсылман ғана қалғанда Пайғамбар (с.а.с.) Алланың әмірін күтіп жатады. Бұл кезде Мәдинаға көшпей, Пайғамбардың (с.а.с.) рұқсатын күтіп жүрген Әбубәкір де Алланың елшісімен (с.а.с.) бірге һижра жасауға әзір еді. Ақыры Пайғамбармен (с.а.с.) екеуі қоныс аударады. Олар алғашында құрайыштықтарды адастыру үшін үш күн Меккенің сыртындағы Сәуір үңгірінде жасырынып жатады. Осы күндері ол екеуіне Әбубәкірқызы Әсма тамақ тасып тұрады. Олардың сапардағы жолбасшылары Абдулла ибн Ұрайқат еді. Бәдәуи әйелі Умм Мағбад. Мәдинаға бара жатқан жолда Пайғамбар (с.а.с.) мен Әбубәкір шатырда отырған көшпелі араб – бәдәуидің әйеліне жолығады. Оның аты Умм Мағбад еді. Олар әйелден ішетін сүт сұрайды. Умм Мағбад қолында қалған қойдың арық екендігін, емшегінен сүт шықпайтындығын айтады. Сонда Пайғамбар (с.а.с.) әйелден рұқсат алып, қойдың емшегін бір сипап жіберіп сауған кезде сүт сауылдап аға жөнеледі. Ол сүттен алып ішіп, қасындағыларға да береді. Алланың құдыретімен аққан сүт берекелі болып, барлығы шөлдерін басады. Сосын Пайғамбар (с.а.с.) мен Әбубәкір аттанып кетеді. Күйеуі малын айдап өрістен қайтқан кезде Умм Мағбад сол күнгі керемет оқиғаны баян етеді. Ол Пайғамбарды (с.а.с.) сипаттап береді. Сонда күйеуі оның құрайыштықтар іздеп жүрген адам болуы мүмкін екендігін айтады. Пайғамбар (с.а.с.) мен Әбубәкірдің сапары сегіз күнге созылады. Олар күндіз демалып, түнде жүреді. Ал бұл кезде Ясриб қаласының жұрты Пайғамбарды (с.а.с.) тағатсыздана күтуде еді. Пайғамбар (с.а.с.) әуелі Мәдинадан бір көш жердегі Құба деген жерге тоқтап, Ислам тарихындағы ең алғашқы мешітті тұрғызады. Сонда ең алғашқы жұма намазын оқиды. Содан соң Мәдинаға келіп, өзі түсетін үйді табу үшін түйесін еркіне жібереді. Барлық мәдиналық ансарлар Пайғамбарды (с.а.с.) қонақ ету құрметіне ие болуға тырысып, көлігінің шылбырына жабысады. Сонда Пайғамбар (с.а.с.): «Түйеге тиіспеңдер, ол түсетін жерді өзі іздеп табуға бұйырылған», – дейді. Ақырында түйе Бәни Нәжжар тайпасының екі жетім баласына тиесілі алаңқайға барып шөгеді. Пайғамбар (с.а.с.) Әбубәкірден қарыз алып сол жерді сатып алады да, онда мешіт пен жұбайларының бөлмелерін салдырады.
Источник: http://fatua.kz/kz/
