БИБІ ХАДИШАҒА ҮЙЛЕНУІ
Пайғамбар (с.а.с.) ел арасында шыншылдық, сенімділік сияқты мақтаулы сипаттарымен танымал болады. Ол Хадиша бинт Хуайлидпен бірге сауда-саттық жасайды. Ол сауда керуеніне Мұхаммедтің қасына көмекші ретінде малайы Мәйсараны қосып жібереді. Қайтып келген соң Мәйсара Хадишаға Мұхаммедтің адамдармен қарым-қатынасындағы шыншылдығы, соның нәтижесінде былайғы жұрттың оны бірден жақсы көріп кеткендігі туралы, содан соң бұл жолғы саудадан бұрын болмаған мол пайда түскендігін таңдай қаға әңгімелейді. Осы хабардан соң Хадишаның Мұхаммедке деген ынтызарлығы арта түседі. Артынан Мұхаммедке Нәфиса бинт Мунаббиһ атты әйел арқылы үйлену туралы ойын жеткізеді. Болашақ пайғамбар бұл жайында көкелерімен ақылдасып, Хадишаны айттыруға көкесі Әбутәліпті жібереді. БИБІ ХАДИШАНЫҢ МӘҺРІ Пайғамбарымызға (с.а.с.) тұрмысқа шығарда Хадиша анамыздың белгіленген мәһрі 468 грамдай алтын болды. Бибі Хадиша құрайыш тайпасы әйелдерінің ішіндегі ең тектісі әрі көріктісі және мал-мүлік жағынан да артығы болатын. Сол жәһилиет дәуірінде-ақ тектілігі мен көркіне тәнті Мекке жұрты оны қадірлеп «Таһира» – «пәк таза» деп атайтын. Оған үйлену бай-манаптардың көбінің арманы еді. Бірақ ақылды әйел өз таңдауын жасады. Бұл кезде болашақ Пайғамбардың (с.а.с.) жасы жиырма бесте, ал Хадиша анамыздың жасы қырықта болатын. Бибі Хадиша бұрын тұрмыста болған еді.
