Азан – белгілі сөздермен намаз уақытының кіргенін жұртшылыққа жария ету.   Қамат – парыз намаздарының алдында намазға тұрудың басталғандығын білдіретін белгілі сөздер[1].   Бес уақыт намаз бен жұма намазына азан мен қамат айту ер кісілерге бекітілген сүннет, ал әйелдерге мәкруһ саналады[2].   Имам Касани (Алла оны мейіріміне алсын): «Әйелдер, балиғатқа толмаған балалар азанды және қаматты айтпайды. Себебі олардың жамағатпен намаз оқуы жақсы амал болып табылмайды. Ол жөнінде Алла Елшісі (оған Алланың салауаты мен сәлемі болсын):   لَيْسَ عَلَى النِّسَاءِ أَذَانٌ وَ لاَ إٍقَامَةٌ   «Әйелдер азан мен қаматты айтпайды»[3], – деген. Сондай-ақ олардың жамағатпен намаз оқуы дұрыс болмағандықтан азан да, қамат та айтылмайды»[4], – деп келтірген.   Зафар Ахмад Усмани жоғарыдағы хадиске: «Бұл риуаят азаншының ер кісі болу керектігін әрі әйелдердің азан айтуға түк қатысы жоқ екендігін білдіреді»[5], – деп түсіндірме берген.   Сондықтан әйел кісілер жамағат болып немесе жеке намаз оқыса да, азан мен қамат айтуы мәкруһ болып есептеледі.     Ерболат БОХАНОВ, Атырау облысы бойынша пәтуаға жауапты маман  

[1] Әл-Маусуа фиқһия, 2/357. [2] Хашияту әт-Тахтауи, 280-б. [3] Әл-Байһақи, №1/408. [4] Имам Касани, Бадаи әс-санайғ, 1/152. [5] Зафар Ахмад Усмани, Иғләу әс-сунан, 2/633-634.

Источник: http://fatua.kz/kz/