Қазіргі таңда елімізде болсын, әлемде болсын татулық, бірлік өзекті мәселелердің бірі болып отыр. Өйткені, бірлік, ынтымақ болмаған жерде тұрақтылық та, даму да болмайды. Еліміз зайырлы мемлекет ретінде өркен жайып келеді. Ешкімнің дініне, көзқарасына, дүниетанымына қарап қысым көрсетілмейді. Бізде дін бостандығы бар. Барлық адамдар дәстүрлі діндерге, соның ішінде ата дініміз исламға құрметпен қарайды. Қазақстан Республикасының 2010-2022 жылдардағы құқықтық саясат тұжырымдамасында «Дінге сенетін адамдарға құрметпен қарау басты міндет» деп анық айтылған. Демек, біз дін өкілдеріне ілтипат білдіріп, тең дәрежеде қатынас жасауымыз қажет. Сондай-ақ, «Мен мына дінді ұстанамын, ал сен неге бөтен дінді ұстандың?» деп қысым көрсетіп, қудалап жатқан ешкім жоқ. Жоғарыда аталған құжатта: «Қазақстан –зайырлы мемлекет, онда конфессияаралық татулық пен келісім салтанат құруда, дінге сенушілермен қатар атеистік көзқарасты ұстанатын азаматтардың да құқығы құрметтеледі. Мемлекет діни қызмет саласына араласпайды, алайда конфессиялармен өзара іс-қимылды қамтамасыз етуі және азаматтардың діни сенім бостандығы құқығын қорғауы тиіс, ол үшін осы салада тиімді мемлекеттік саясат қалыптасуы тиіс» атап көрсетілген. Демек, біз адам қандай дінді ұстансын, ұстанбасын кемсітпей, құрмет көрсетуіміз керек екен. Бүгінде әлемде діни алауыздық орын алып жататыны жасырын емес. Соны бейбіт жолмен шешу қажеттілігі күн тәртібінен түскен емес. Иә, қазір жағаласатын емес, жүрекпен ұғысып, араласатын заман. Адам баласының жүрегінде иман, мейірімділік бар болса, шешілмейтін мәселе болмайды. ҚР президенті Н. Назарбаетың ұсынысымен бұрынғы Астана, қазіргі Нұр-Сұлтан қаласында 2003 жылдан бері әлемдік дін лидерлерін жиналып, дін саласындағы ортақ мәселелерді шешу жолдарын қарастырылып келеді. Дәстүрлік сипат алған осынау басқосуда дін саласындлағы небір өткір әрі күрделі мәлелелер шешімін тауып, дін аралық түсінбеушіліктің алдын алу жұмыстары жүргізілді. Басты мақсат – дінаралық татулықты сақтау, әлемде бейбітшіліктің салтанат құруына қыпал ету. Елбасы Нұрсұлтан Назарбаев әлемдік және дәстүрлі діндер лидерлерінің VI съезі съезінде: «Материалдық игілікпен мүлдем байланысты емес адам үшін басым және негізгі болып қала беретін дау тудырмас құндылықтар бар. Олардың бастысы – руханият, имандылық. Олардың негізгі көзі әр халықтың ғасырлар бойы қалыптасқан ұлттық және діни дәстүрлерін, өзіндік тарихи әрі мәдени тәжірибесін сақтаушы дін болып табылады» деген еді. Ислам діні татулықты, ауызбіршілікті көздейді. Сондықтан дін өкілдері дінаралық, конфессияаралық татулықты нығайтуға барынша үлес қосып келеді. Алла тағала Құран Кәрімде: «Дін турасында сендермен соғыспаған әрі сендерді өз Отандарыңнан қуып шығармаған адамдарға жақсылық жасауларыңа және оларға әділетті болуларыңа Алла тағала қарсы емес. Өйткені, Алла тағала әділеттілік жасағандарды жақсы көреді», – деген (Мумтахина сүресі, 7-аят). Осы аяттың мағынасына үңілсек, Алла тағала өзге дін өкілдерімен бейбіт ғұмыр кешуге, сондай-ақ мұсылмандардың оларға жақсылық әрі әділдік танытуларына мұрсат бергенін аңғарамыз. Сондықтан көпэтносты, көпдінді елімізде өзара келісім, руханият пен ынтымақтастықты нығайтудың маңызы зор. Қасиетті Құранда исламның өзге дәстүрлі діндерді, пайғамбарларды, көктен түскен кітаптарды мойындайтындығы айтылған. Қазіргі жаһандану заманында халықтардың тіршілігінде көптеген мәлелелер туындауда. Кез келген қиындыққа төтеп беріп, қазақы әдет-ғұрпымызды, мәдениетіміз бен өнерімізді сақтап қалу үшін бізге осы ортада өмір сүрудің парасатты жолы қажет. Ол үшін, алдымен, халықтар арасында бір-біріне деген сенімді нығайтып, әдет-ғұрпы мен салтын, діни сенімі мен өркениетіне түсіністікпен, құрметпен қарау керек. Ерекше айта кетерлігі, Қазақстан мұсылмандары діни басқармасы қоғамдағы діни ахуалдың орталығы мен ұйытқысы болу жолында өзара түсіністікке жетуге күш салып келеді. Нақтырақ айтақанда, діни басқарма тапарынан дінаралық татулық бағытта имамдар форумын өткізу, Дін істері басқармаларымен өзара қолтық жұмыс жасау, қоғамда жұмыс жүргізу және әртүрлі діни конфессиялармен меморандум бекіту бағытында жүйелі жұмыс жүргізілуде. Сондай-ақ, дін саласындағы уәкілетті орган болып табылатын Дін істері комитеті қоғамымызда дінаралық келісім мен тұрақтылықты нығайту ісінде мемлекеттің салиқалы саясатын табысты іске асыруда. Қос тараптың бірлесіп жұмыстар жүргізуі құптарлық іс болды. Біз мұны үлкен жетістік деп есептейміз. Адам баласы ізгілік, рақым, мейірімділік секілді мәңгілік ұғымдарды санаға дарыту арқылы тазартуы керек. Себебі адам түзелгенде ғана заман түзеледі. Қиюы қашқан заманды түзеу - әр адамның міндеті. Сондықтан дін өкілдері халықтар достығына, ұлтаралық, дінаралық татулықтың нығая түсуіне өз ықпалын тигізуде. Қазақ халқында «Отаны бірдің – тілегі бір, тілегі бірдің жүрегі бір» деген игі сөз бар. Ислам діні татулық мен мейірімділікке шақырады. Адамдарға мейіріммен қарау, дауласқанды татуластыру, көршімен қарым-қатынаста болу мұсылманшылдыққа жатады. Ардақты пайғамбарымыз, екі дүниенің сардары Мұхаммедтің (с.ғ.с.) хадисінде: Алла елшісінің (с.ғ.с) әйелі Айша (р.а.): «Уа, Расулалла! Менің екі көршім бар, сыйды соның қайсысына берейін?» – деп сұрағанда, Алла Елшісі (с.ғ.с): «Есігі ең жақын орналасқанына», – деп жауап берген екен. (Бұхари). Осынау хадистен біз өзге ұлт өкілі немесе өзге дін өкілі болғанына қарамастан көршімен тату болуға, мейіріммен қарауға, қайырымдылық жасауға шақыратынын байқаймыз. Егемендік алған жылдардан бері елімізде тамаша дәстүрлер қалыптасты. Біз жыл сайын Рухани келісім күнін, Құрбан айт секілді діни мерекеліріміз бен өзге де дін өкілдерінің ұлттық, діни мерекелерін бірге тойлаймыз. Бұл халық пен елдің, өзге діндер мен ұлттардың бөлінбей, керісінше бірге, тату болып отырғандығының көрінісі дер едім. Бірлік бар жерде – тірлік барын ұққан халықпыз. Ешжеше, елімізде ауызбірлік пен түсіністік, сыйластық, бейбітшілік пен келісім мәңгілік орнап тұруына барымыз атсалысуымыз қажет. Қаратал аудандық орталық мешітінің бас имамы: Бердібек Нұқтарұлы