Рахымды мейірімді бір Алланың атымен бастаймын!
Барлық мақтаулар мен мадақтар әлемдердің раббысы бір Алла Тағалаға болсын, салауаттар мен сәлемдемелер пайғамбарымыз Мұхаммед Мұстафа (صلى الله عليه وسلم)-ға болсын.
Алла Тағала Қасиетті Құранда әл-Имран сүресінің 97-ші аятында былай баяндайды: «Алланың үйін зиярат етуге шамасы жететін әрбір адам үшін қажылыққа бару – оның мойнындағы Алланың хақысы. Ал кімде-кім күпірлік қылып мұны мойындамаса, Алла Тағала оның қажылығына тіпті күллі Әлемге зәредей де мұқтаж емес».
Қажылық – Ислам дінінің ұстыны болған бес парыздың бірі. Әлеуметтік жағдайы келген әрбір мұсылман өмірінде бір рет қажылық амалын орындау парыз.
الحج (әл-хажж) сөзінің тілдік мағынасы: мақсат ниет ету болса, шариғи мағынасы: құлшылық ету ниетімен Меккедегі Қағбаны зиярат етіп, Алла Тағала орындауын талап еткен амалдарды орындау. Шариғатта қажылықтың екі түрі белгіленген:
1. الحج (әл-хажж) – үлкен қажылық. Қажылықтың бұл түрі - Құрбан айт уақытында, яғни Зул-Хижжа айының 8,9,10-шы жұлдызында орындалады.
2. العمرة (әл-умра) – кіші қажылық. Умра Зул-Хижжа айының 8,9,10-нан басқа уақыттарда орындала береді.
Жоғарыда айтылғандай жағдайы келген мұсылманның өмірінде бір рет қажылық амалын орындау парыз болса, шамасы келген жағдайда тағы қажылыққа бару мустахаб болады. Яғни барса – сауап, бармаса – күнәхар емес.
Ибн Омардан (Алла ол екеуіне разы болсын) жеткен хадисте: Алла Елшісі (صلى الله عليه وسلم) «Ислам бес нәрсеге негізделген:
1. Алладан басқа Құдай жоқ, Мұхаммад Оның Елшісі - деп куәлік беру
2. Намаз оқу
3. Зекет беру
4. Қажылыққа бару
5. Ораза ұстау »- деген.
Әбу Хурайрадан (Алла оған разы болсын) жеткен хадисте: «Бір күні Алла Елшісі (صلى الله عليه وسلم) бізге уағыз айтып тұрып: Уа, адамдар! Расында Алла Тағала сендерге қажылықты парыз қылды, ендеше қажылық парызын өтеңдер – деді. Сонда арамыздан бір кісі: Уа, Алланың Елшісі! Жыл сайын өтейміз бе? – деп сұрады. Алла Елшісі (صلى الله عليه وسلم) Егер Иа деп айтсам мойындарыңа парыз болып қалар еді. Ал шынын айтқанда оған шамаларың жетпейді ғой – деді. Соңынан бәрімізге: Сендерге шариғаттың қандай да бір үкімін айтып, оны міндеттемегенімше орынсыз көп сұрақ қойып мені мазаламаңдар, өйткені сендерден бұрынғы қауымдардың түбіне жеткен – орынсыз қойылған сауалдар мен Пайғамбарларына қарсы шығуы. Ендеше, бұйырғандарымды шамаларың келгенше орындауға тырысыңдар! Не нәрседен тыйсам, содан бойларыңды аулақ ұстаңдар» - деп ескертті.
Қорытындылай келе, Алла Тағала баршамызға Қажылық пен Умраға баруды нәсіп етсін! Әмин!
Б.С.Жұмағалиев.
«Жетісу» мешітінің Бас имамы.
ҚМДБ-ның Талдықорған өңірі бойыңша Қажылық-Дархан дала жобасына жауапты маман.
