Рахымды мейірімді бір Алланың атымен бастаймын!

Барлық мақтаулар мен мадақтар әлемдердің раббысы бір Алла Тағалаға болсын, салауаттар мен сәлемдемелер Пайғамбарымыз Мұхаммед Мұстафа (صلى الله عليه وسلم)-ға болсын.

Дінімізде қасиетті саналған күндер бар. Мысалы, екі айт күндері, жұманың күндізі мен түні және Рамазан айының күндізі мен түні - Қасиетті болып есептеледі. Рамазанның ішінде, әсіресе соңғы он күндігі ерекше қасиетке ие. Өйткені, бұл кештерде адам баласының бір жылдық тағдыры белгіленетін - Қадір түні бар. Қадір түнінде Алла Тағала дүние аспанына Қасиетті Құран Кәрімді түсірген.

Қадір түнінде Қыдыр атаны күтеміз деудің ешқандай діни негізі жоқ. Бұл аңыз. Мұсылмандар бұл Қасиетті түнді біреуді күтіп емес, аятта бұйырылған ғибадаттарын жасап, сауап үмітімен өткізгендері дұрыс. Қадір  түні Алла Тағаланың разылығы үшін жасалған әрбір ғибадат іс құлшылық болып есептеледі. Білім іздену, намаз және Құран оқу, Алла Тағаланың жаратылысын дәріптеуде осының барлығы құлшылық болып саналады. 

Айша анамыздан (Алла оған разы болсын) жеткен хадисте: Пайғамбарымыз   (صلى الله عليه وسلم) «Рамазан айының соңғы он күндігі кіргенде Алла Елшісі (صلى الله عليه وسلم) түні бойы намаз оқитын, отбасын оятып, құлшылыққа ерекше ыждағаттылық білдіретін», - деп айтты.

Алла Елшісі (صلى الله عليه وسلم): «Рамазанның соңғы он күндігін мешітте өткізіп, Қадір түнін Рамазан айының соңғы он күндігінен іздеңдер» – деп айтатын. 

Айша анамыздан (Алла оған разы болсын) жеткен хадисте: «Йа  Алланың Елшісі (صلى الله عليه وسلم) мен қадір түнін болғанын білсем, не деп айтамын, - деп сурағанымда, Ол (صلى الله عليه وسلم) Йа Раббым, сен кеішірімдісің және кешіргенді жақсы көресің. Мені ғафу ет» – деп тіле деді.

Иғтикаф сөзінің тілдік мағынасы бір іске білек түріп кірісу оған шынайы берілу. Шариғи мағынасы белгілі бір уақытта бес уақыт намаз жамағатпен оқылатын мешітте ғибадат ниетімен болу. Әйел кісілердің иғтикаф орны оның үйі. Рамазан айының соңғы он күндігінде иғтикаф ету - сүннет. Пайғамбарымыз (صلى الله عليه وسلم) әр жылда Рамазан айының соңғы он күнін мешітте иғтикафта өткізген. Иғтикаф тек Рамазан айында ғана емес, он екі айдың кез келген уақытында орындауға болады. Иғтикафтағы мақсат Алла Тағаламен оңаша қалып, оған құлшылығын орындау. Рамазан айындағы Иғтикафта болу амалдардың сұлтаны. Иғтикафта болған адам басқа мешітте намаз оқу үшін, үлкен кіші қажетін өтеу үшін, мешітте қалу қаупі болса, мешітте жамағатпен бес уақыт намаз оқу тоқтатылған жағдайда, осы аталған себептер орын алғанда мешіттен шығуға болады. 

Қорытындылай келе, Алла Тағала ұстаған оразамызды, істеген құлшылық ғибадаттарымызды және тілеген дұға-тілектерімізді өзінің рахым-мейірімімен қабыл қылсын. Әмин!

Ақылбеков Марлен

Талдықорған қаласы, «Жетісу» мешітінің ұстазы