Жыл 12 айдың ішіндегі ең қасиетті, ең сауапты ай, ол-Рамазан айы. Алла Тағала бұл айды бізге үлкен нығмет қылып берді. Себебі Пайғамбарымыз (с.ғ.с.) бір хадисінде: «Егер адам баласы рамазан айының не екенін лайықты түрде түсіне білсе, бір жылдың бастан-аяқ Рамазан болуын қалар еді»,-деген.
Осы хадиске сүйене келе, бұл айдың қаншалықты құнды ай екенін меңгеруге болады.

Бұл айда күллі мұсылман қауымы ауыз бекітіп, барынша Алланың разылығын табуға тырысады.
Яғни, таң сәреден күн батқанша ішіп-жеуден, түрлі жаманшылық атаулыдан өзін пәк ұстап, күнә істерді тоқтатады. Рамадан сөзі «күйдіру, өте ыстық» дегенді, яғни өткен күнәларды күйдіріп, өшіруші деген мағына білдіреді. Және бұл айда жасаған сауапты амалдар, берген садақа да басқа айдан қарағанда айрықша сауаптырақ болады. Ол тұрғысында:
Имам Муслим таратқан риуаятта Алланың Елшісі (с.ғ.с) былай дейді: «Адам баласының әрбір іс-амалы оннан жеті жүз есеге дейін көбейтіледі. Даңқты да ұлы Алла былай дейді: «Тек оразаның жөні бөлек. Оның сауабын Өзім беремін. Өйткені ол Мен үшін қызықтардан, ішіп-жемнен бас тартқан». Ораза тұтушының екі қуанышы бар: біріншісі оразасын ашқанда, ал екіншісі Раббысымен жолыққанда. Сөзсіз, ораза тұтушының аузынан шыққан иіс Алланың құзырында хош иісті мисктен артық».
Рамазан айының тағы бір өзіндік артықшылығының бірі:
Пайғамбарымыз (ол ) өзінің хадисінде:

«Рамазан айының әуелгі бөлігі – мейірімділік, ортасы – кешірім, соңы тозақтан босату»,– дейді.
Осылайша сүйікті Пайғамбарымыз (ол кісіге Алланың игілігі мен сәлемі болсын) жалпы Рамазан айының, оның ішінде оның ортаңғы он күнінің кешірім уақыты екенін айтып сүйіншілеуде. Бұл жайында Пайғамбар (ол кісіге Алланың игілігі мен сәлемі болсын):

«Кімде-кім Рамазан айында шынайы иманмен әрі оның сауабынан үміт еткен күйде ораза ұстаса, оның бұрынғы күнәлары кешіріледі»,– дейді.
Ардақты Пайғамбарымыз (ол кісіге Алланың игілігі мен сәлемі болсын) қасиетті айдың сауаптылығын бізге осылайша баяндауда. Бұл ай – ораза айы. Ендеше, Ұлы Раббымыздың мейірімінен үміт етіп, кешірімге жетелер бірден-бір жол – осы оразаны барынша лайықты түрде орындап, оның сауабын бір Алладан ғана күту.

Жыл сайын асыға күткен қасиетті Рамазан айына жеткенімізге Алла Тағалаға сансыз шүкірлер болсын. Қасиетті айда күнәларымыз кешіріліп, сауаптарымыз артсын! Барша мұсылман бауырларды Рамазан айының келуімен құттықтаймын. Қасиетті рамазан айында Отанымызға, елімізге, барша адамзатқа тыныштық пен бақыт, келесі оразаға аман-сау жетуді нәсіп еткей! Әмин!

Қаратал ауданы “Орталық мешітінің” бас имамы: Нұқтарұлы Бердібек