Айлардың сұлтаны болған қасиетті Рамазан айы қашан да барша мұсылман қауымы үшін қастерлі де қадірлі. Ораза айын барша мұсылман қауым қуана қарсы алып, қимай шығарып салады. Бұл айда жасалатын құлшылықтар мен ізгі амалдардың сауаптары еселеніп пендені ұлы Жаратушысына жақындата түседі. Сарқылмас сауабы мол мүбәрак айда мүмкіндігі бола тұра ауыз бекітпей, немқұрайлық қылғандар Раббысының разылығын ала алмай сауаптан құр қалатынын да ескертеді пайғамбар хадисінде.
Ораза – денсаулығы жарамды, ақыл есі дұрыс, бойы таза(әйелдерге тән жағдайлар) тұрақты (сапарда болмаған) әр мұсылманға парыз.
Алла Тағала қасиетті құранда : «Әй мүміндер! Сендерге бұрынғыларға парыз етілгендей ораза парыз қылынды. Әрине сақсынасыңдар»,-дейді.
Ал, ауырған адам жазылғанда, сапардағы адам үйіне оралғанда, бойы таза емес әйел(етеккірден) тазарғанда оразасын жалғастырады. Қазасын рамазан айынан соң тұтастай немесе бөліп күнбе күн өтеуі керек болады.
Бұл турасында Құранда: « Сонда сендерден кім ауру немесе жолаушы болса, басқа күндерде өтер»
«Сендерден кім рамазан айында болса, ораза ұстасын. Ал біреу науқас не сапарда болса, басқа күндерде санын толтырсын. Алла сендерге оңайлық қалайды, ауыртпалық қаламайды. Сендерді тура жолға салған Аллаға шүкірлік етулерің үшін санын толтырыңдар әрі Алланы ұлықтаңдар» (Бақара сүресі 183-185 аяттар)
Егер де ораза тұтуға қауқары жетпейтін әрі кәрі не созылмалы дерті бар кісі болса, онда әрбір күнге бір міскінді күніне екі уақыт тамақтандыруы тиіс немесе күніне фидия садақсын береді. Егер оған жағдайы келмесе, Аллаға тәубе етеді. Ақиқатында Алла пенделерінің жағдайынан хабардар.

Оразаның шарттары
1. Мұсылман болу. Ораза мұсылмандарға парыз.
2. Балиғат жасына жеткен болуы және ақыл-есі түзу болу:
3. Ниет ету. Рамазан оразасына ниет еткенде әр күніне ниет ету шарт.
4. Ораза ұстауға шамасы келу және жргікті тұрғын болу. Науқас немесе жолаушы адамға парыз емес. Бірақ ондай кісілер ораза ұстаса, оразасы дұрыс саналады. Ал, ораза ұстамаса жолаушы адам сапардан келген соң оразасын жалғастырады, қаза күндерін айттан кейін өтейді. Ал, науқас адам ауыруынан айыққан соң қазасын өтеуі керек. Кәрілік жасқа келіп, ораза ұстауға шамасы кемеген жандарға ораза парыз емес. Сонымен қатар хайыз (етеккір) нифас (босанғаннан кейінгі бойы таза емес кездер) әйелдер және өзіне немесе баласына зиян тиюі ықтимал аяғы ауыр әйелдер мен бала емізген әйелдерге де парыз емес. Бұндай жағдайдағы кісілер ұсамаған күндерінің қазасын өтейді. Ал, кәрі адамдар оразаның қазасын өтемейді. Шамасы келсе отыз күн оразаның орнына күніне бір мұқтажды таңда және кешке тамақтандырады немесе ақшалай фидия береді.

Оразаны бұзбайтын жағдайлар

Ұмытып ішіп, жеу. Бұл жағдайда ораза екені есіне түссе ішіп-жеуден тыйылу керек.
Еріксіз тамағына шаң, тозаң, түтін кіру.
Түкірік жұту.
Тістің арасында тұрған бұршақ көлемінен кішкентай нәрсені жұту.
Анализ үшін қан алдыру.
Тіс емдету, жұлдыру. Дәрінің , қанның тамақтан өтіп кетуінен сақтану қажет.
Көзге, құлаққа дәрі тамызу.
Денеге май, дәрі, спирт, крем жағу.
Суға шомылу.
Сумен ауыз, мұрын шаю. Бірақ тамаққа кетпеуін қадағалау қажет.
Еріксіз құсу.
Сәресіге ұйықтап қалу. Сәресіге ұйықтап қалған адам, тамақ ішпестен оразасын жалғастыра береді.

Оразаны бұзатын жағдайлар

Біле тұра ішіп-жеу.
Ауызы берік кезде жыныстық қатынасқа түсу.
Әдейі зорлықпен құсу.
Клизма жасату.
Бойға қуат беретін укол салдыру.
Дәрі ішу.
Қар, жаңбырдың жұтылуы.
Ауыз шайғанда тамақтан судың өтуі.
Әйелдердің етеккірінің келуі.

Оразаның ниеті

«Уа, Алла! Мен осы рамазан айында Өзіңнің разылығың үшін имани әрі сауабынан үміт еткен түрде ораза тұтуға ниет еттім. Уа, Алла! Оразамды қабыл ал, күнәларымды кешір әрі оразамның берекесін бер!»

Ауыз ашар дұғасы

«Уа, Алла! Сенің разылығың үшін ораза тұттым әрі сенің берген ырыздығыңмен ауыз аштым. Менің біліп-білмей істеген күнәларымды кешірегөр»
Алла Елшісінің (ол кісіге Алланың игілігі мен сәлемі болсын) «Ораза тұтушының ауызашардағы қабыл алынбай қоймайды»,- дегені бар.

Биыл рамазан айы 1-ші сәуірден 2-не қараған түні кіреді. 2-сәуір оразаның бірінші күні. Сәуірдің 27 нен 28-не қараған түні қадір түні. 2- мамыр ораза айт күні.
Қазақстан мұсылмандары діни басқармасының кеңейтілген төралқа мәжілісінде биылғы пітір садақасы жан басына 2 кг ұнның орташа бағасымен 500 теңге болып белгіленді.
Ораза қабыл болсын ағайын!

Ауданның бас имамы Әнет ОМАРХАНҰЛЫ