Рамазанның алғашқы он күні – мейірім күндері
Рахымды мейірімді бір Алланың атымен бастаймын!
Барлық мақтаулар мен мадақтар әлемдердің раббысы бір Алла Тағалаға болсын, салауаттар мен сәлемдемелер пайғамбарымыз Мұхаммед Мұстафа (صلى الله عليه وسلم)-ға болсын.
Айлардың сұлтаны болған Рамазан айыда келіп жетті. Бұл айдың ерекшелігі Тозақ отының есіктері жабылып, Жәннәт есіктері ашылып, барлық шайтандар кісенделеді және Алла Тағала жәннәтті күніге әсемдейді. Пайғамбарымыздың (صلى الله عليه وسلم) хадисінде келген: «Рамазанның алғашқы 10 күндігі – ол мейірім, екінші 10 күндігі – кешірім, ал соңғы 10 күндігі – тозақ отынан азат болуы», - деген.
Әбу Һурайра (р.а.): «Алла Елшісі (صلى الله عليه وسلم): «Ұлылығы шексіз Алла Тағала: «Адам баласының ұстаған оразасынан басқа барлық істері (құлшылықтары) өзіне. Ал оразаның жөні бөлек, өйткені ораза - Менің разылығым үшін ұсталады, сондықтан оның қарымын (сауабын) Өзім беремін», - деген. Ораза – (иесін күнәлардан, тозақтан қорғайтын) қалқан. Кім болса да, ораза ұстаған күні жаман сөз айтпасын, әрі ешкімге дауыс көтермесін. Егер оған біреу тіл тигізсе, не болмаса онымен ұстасып, төбелеспек болса, оған: «Менің аузым берік!» - деп ескертсін. Алла Елшісінің (صلى الله عليه وسلم) жанын уысында ұстаған Алланың атымен ант етейін! Ораза ұстаушының аузынан шыққан жағымсыз иіс Алла Тағаланың құзырында мисктен (хош иісті әтірден) де жұпары болып табылады. Ораза ұстаушының екі үлкен қуанышы бар: ауыз ашқанда, ауыз ашқаны үшін қуанады және Раббысымен қауышқанда, ораза ұстағаны үшін қуанады»,-деп айтты», - деген.
Міне біз Рамазан айының алғашқы 10 күндігінде отырмыз. Сол үшін Алла Тағалаға шүкіршіліктерімізді білдіріп, көбірек амал жасауымыз керек. Сол үшін біз Рамазан айының қадірін түсініп білуіміз керек, өйткені бұл Рамазан айына жетпей қалған қанша адам бар. Бәлкім бұл айда біздің соңғы айымыз болуы мүмкін, сол үшін бұндай берекелі айдағы мүмкіндікті зая жіберіп алмауымыз керек.
Пайғамбарымыз (صلى الله عليه وسلم) Рамазан айын ерекше өткізетін, таңертең сәресіне тұрып және оны басқаларға айтатын: «Сәресіде береке бар, су болсада ішу керек»,-деген.
Пайғамбарымыз (صلى الله عليه وسلم) өте көп құлшылық жасайтын, соның ішінде Құранға көп мән беретін. Рамазан айында Пайғамбарымыз (صلى الله عليه وسلم) ерекше жомарт болатын.
Рамазан айы – бұл бір ерекше мектеп деседе болады. Ол жерде пайда беретін көп нәрселерді үйренсе болады. Біріншіден бұл айда Құран түсірілген. Сол үшін кеңес беремін мұсылман бауырларыма: көбірек Құранға көңіл бөлуді және жақсы амалдарды көбірек жасауды.
Қорытындылай келе, барша мұсылмандардың Алла Тағала Рамазан айында ұстаған оразаларын, дұға-тілектерін қабыл етсін. Әмин!

"Жетісу мешітінің Бас имамы

Жұмағалиев. Б .С.