Адамзаттың бақыты ғұмыр кешуі үшін Алланың мейірімі болған берекеттің бірі – Құран деген хикмет пен нұрға толы тылсым күш еді. Құран – адамзат тарихының айырылмас бір бөлшегі. Себебі адам өмірінің бақытты болуы тікелей Құранға байланысты. Бұл қасиетті кітаптың адамзатқа жіберілу кезеңінің өзі, уақыт мезгілі де орасан зор хикметке толы. Раббымыз сырға толы мұғжиза болған, тура жолға бастаушы Құран түскен ай туралы Бақара сүресінің 185 аятында былай баяндаған.
«Рамазан айы – адамзатты тура жолға бастаушы, айқын дәлелдерді һәм ақиқатпен жалғанның ара-жігін ажырататын өлшемдерді қамтыған Құран түсе бастаған ерекше ай».
Бұл құрметті айды Жаратушы Алла Тағаланың ерекше айту себебі адамзаттың нұрлы жол бастаушысы Құран түскен ай екендігінде жатыр. Бірақ сол Құран түскен айда Алланың кітабымен байланысымыз қалай қалыптасуда? Алла Тағала «Бақара» сүресінің 81 аятында былай деп ескертеді:
«Құраннан, мүміндерге, шипа және рахмет түсіреміз. Ол, залымдардың зиянын тым арттыра түседі» – деп залымдардың жазасыз қалмайтынын жеткізеді. Аяттағы шипа сөзін ғалымдар «адамзат баласының жасаған қателіктері себепті жүректеріміз көре алмаушылық, тәкаппарлық, менмендік сынды сезімдерге толатын, құрдымға жіберетін дерттерді айтады. Құран сол жүректің емі екенін жаратушымыз ашық айтып отыр. Онда кәпірлер емес залымдар деп тікелей айтудың өзі Алланың бұйрығына немқұрайлылық танытқан жанның барлығы залым және өз-өзін зиянға жіберуші әрбір пенде Құраннан алыстау арқылы зиянға ұшрайтынын ескерткен» дейді.
Әбу Үмәма (р.а) келген хадисте «Алла елшісі (саллаллаһу аләйһи уә сәлләм): «Құран оқыңдар! Өйткені Құран қиямет күні (Құран) оқығандарға шапағатшы болады», – деп айтқанын естідім», – деген. Олай болса бізге Алланың берекетін алып келетін шапағатшы кітап – Құранмен үнемі байланыста болуымыз керек. Бірақ, өкінішке орай кейде кейбіріміз айлап Құран бетін ашпай кетсек, енді біріміз: «кейін оқып алам» деген сылтаумен тіпті Құранның әрпінде танымаймыз. Алайда Иман шартының бірі – кітаптарға иман болса, сол кітаптардың ең соңғысы әрі мұғжизасы Құран емес пе?! Ал, Рамазан айы – Құран айы! Бұл айда Құранды көп оқуды әдетке айналдырыңыз.
Алла Тағаланың Құранға ерушілерді тақуалар деп тілге тиек еткені әрбір мұсылманға қуаныш сыйлауы тиіс. «Бақара» сүресінің 2 аятында Жаратқан Раббымыз: «Міне, (мұғжиза) Кітап. Онда (яғни, оның көктен түскен илаһи кітап екендігінде) еш күмән жоқ. Ол – (Аллаға толық бойұсынған, күнә атаулыдан барынша сақтанатын) тақуа жандарды тура жолға бастаушы» – деп сүйіншілейді. Олай болса неге Құранды көп оқу арқылы тақуа жандардың қатарынан болмасқа?!
Құран айы Рамазанда Құранға амал етіп, оны Жаратушы Жаббар Иеміздің бұйрығы ретінде махаббатпен қайта-қайта оқуымыз жыл бойы күнәден қарайған жүрегімізді нұрландырары сөзсіз. Осы ұғымның растығын Алла елшісінің өнегелі өмірінен байқаймыз.
Ибн Аббас (р.а): «Алла елшісі (саллаллаһу аләйһи уә сәлләм) адамдардың арасында ең жомарт жан болатын. Рамазан айы туып, Жәбірейіл (а.с) періштемен жиі жолыққанда, одан өткен мәрт адам болмайтын. Жәбірейіл (а.с) періште Рамазан айының мүбәрак әр түнінде Пайғамбарымызға (саллаллаһу аләйһи уә сәлләм) келіп, екеуі бірге Құран оқитын. Алла елшісі (саллаллаһу аләйһи уә сәлләм) Жәбірейіл (а.с) періштемен жолыққан кезінде жер бетіне береке әкелетін желден де жомарт болып кететін еді», – деген.
Ақиқатын айтар болсақ Алла елшісі (саллаллаһу аләйһи уә сәлләм) жақсы көрген және орындаған бұл амалды жүзеге асыру арқылы Рамазанның берекетін арттырайық!
Омар ибн ал-Хаттаб (р.а) жеткізген хадисте: «Пайғамбарымыз (саллаллаһу аләйһи уә сәлләм): «Расында, Алла Тағала осы кітаппен кейбір қауымдардың (екі дүниеде де) мерейін өсіріп, енді бір қауымның дәрежесін түсіріп, жер қылады», – деп айтты» – деген. (Муслим, Салатүл-мусафирин 269)
Пайғамбарымыз (саллаллаһу аләйһи уә сәлләм) бізге сүйіншілегендей Құран айы болған Рамазанда Құранға деген байланысымызды арттыру арқылы Жаратушы Иеміз жалпы қазақ елінің мәртебесін көтерсін десеңіз әуелі өзіңіз бірінші болып, Құранды үнемі оқуды әдетке айналдырыңыз!

Ескелді ауданның бас имамы

Мухамед Ордыбай