Рахымды мейірімді бір Алланың атымен бастаймын!
Барлық мақтаулар мен мадақтар әлемдердің раббысы бір Алла Тағалаға болсын, салауаттар мен сәлемдемелер пайғамбарымыз Мұхаммед Мұстафа (صلى الله عليه وسلم)-ға болсын.
Тәһәжуд – түнде ұйықтамау деген мағынаны білдіреді. Демек Тәһәжуд намазы – түнде ұйықтамаған уақытта оқылатын намаз. Тәһәжуд намазының уақыты құптан намазы кіргеннен кейін және таң намазы кіргенге дейін аралықта оқылатын намаз. Ракағат саны ең азы 2 ракағат, ең көбі әркімнің шама шарқына қарай. Тәһәжуд намазын оқу үшін ұйықтап тұру шарт емес, әрі ол құптан және үтір намазынан кейін оқылсада болады. Тәһәжуд намазын оқудың ең сауабы көп уақыт - түннің үшінші бөлігінде, яғни таң атудың алдында оқу сауабы мол.
Алла Тағала Сәжде сүресінің 16-шы аятында баяндайды: «Олар түн ішінде төсектерін тәрк етіп, бір жағынан Алланың қаһарынан қорқып, екінші жағынан шексіз мейірімінен үміт еткен күйде Раббыларына жалынып-жалбарына дұға етеді. Сондай-ақ өздеріне ризық-несібе ретінде берген нығметтеріміздің бір парасын ізгілік жолында жұмсайды».
Абу Һурайра (Алла оған разы болсын) жеткен хадисте: Алла Елшісі (صلى الله عليه وسلم) «Қандай адам болмасын, ұйқыға кеткенде шайтан оның желкесіне үш бірдей түйін түйіп, ұйықта, ұйықта, алдыңда әлі ұзақ түн бар – деп әр түйінді жеке-жеке дуалап кетеді. Егер ол соған қарамастан түн ішінде оянып, Алла Тағаланы есіне алса, әлгі түйіндердің біреуі шешіледі. Егер тұрып дәрет алса, тағы біреуі шешіледі. Ал егер түн намазын оқыса, соңғысыда шешіліп, түйіндердің бәрінен құтылады. Осылайша ол таңертең сергек тұрады әрі көңіл-күйі көтеріңкі болады. Олай істемеген жағдайда ол таңертең көңілсіз әрі дел-сал болып оянады,»-деп айтты.
Абу Һурайра (Алла оған разы болсын) жеткен хадисте: Алла Елшісі (صلى الله عليه وسلم) «Түн жарымда намазға тұрып, әйелін де намазға оятқан, оянбаған жағдайда бетіне су бүркіп, тұрғызатын ер адамды Алла Тағала мейіріміне бөлесін! Сондай-ақ түнде намазға тұрып, күйеуінде намазға оятқан, оянбаған жағдайда бетіне су бүркіп, тұрғызған әйелді де Алла Тағала мейіріміне бөлесін!»-деп айтты.
Жәбир (Алла оған разы болсын) жеткен хадисте: Алла Елшісінің (صلى الله عليه وسلم) «Расында түннің бір уақыты бар қандай да бір мұсылман сол уақытта тура келіп, Алла Тағаладан дүниеге және ақыретке қатысты жақсылық сұраса, сұрағанын міндетті түрде береді. Бұл әр түнде де солай болады» - деп айтқанын естідім.
Қорытындылай келе, Алла Тағала барлығымызға Тәһәжуд намазын оқуымызға мүмкіншілік нәсіп етсін. Сол Тәһәжуд намазында тілеген дұға-тілектерімізді қабыл етсін.

Жұмағалиев.Б.С.
"Жетісу " мешітінің Бас имамы.