Рахымды мейірімді бір Алланың атымен бастаймын!
Барлық мақтаулар мен мадақтар әлемдердің раббысы бір Алла Тағалаға болсын, салауаттар мен сәлемдемелер пайғамбарымыз Мұхаммед Мұстафа (صلى الله عليه وسلم)-ға болсын.
Зұлымдық (الظلم) сөзінің мағынасы: әділетсіздік, бассыздық ету, шектен шығу. Зұлымдық сөзінің антонимі – амандық. Ал амандық сөзінің тілдік шариғи мағынасы: қауіп-қатерден аман болу. Амандықтың негізін адам басымен оның мүлкіне қауіп-қасіретпен жамандықтан аман болуы құрайды. Осы себептен, Ислам дінінде амандықтың алатын орны ерекше. Пайғамбарымыздың (صلى الله عليه وسلم) көп хадистерінде зұлымдық жасауды тыйған.
Жәбирден (رضي الله عنه) жеткен хадисте: Алла елшісі (صلى الله عليه وسلم) «Біреуге зұлымдық жасаудан сақтаныңдар! Шын мәнінде, зұлымдық – қиямет күні (қаскүнем үшін) тастай қара түнекке айналады. Сараңдықтан да бойларыңды аулақ ұстаңдар! Расында, сараңдық сендерге дейінгі қауымдардың түбіне жеткен. Олар сараңдықтың салдарынан бір-бірінің қанын төгіп, (зинақорлықпен өсімқорлық секілді) өздеріне харам етілген күнә істерді адал деп есептеуге дейін барды.»
Алла Тағала айтады: «Ей, құлдарым! Мен Өзіме зұлымдық жасауды харам еттім, сендерге де зұлымдық жасауды харам еттім. Бір-біріңе зұлымдық етпеңдер. Ей, құлдарым! Мен тура жолға салған пендемнен басқаларың адасудасыңдар сондықтан менен тура жолда болуды тілеңдер. Ей, құлдарым! Сендер күндіз-түні қателесесіңдер. Ал күнәларды кешіруші менмін. Күнәларың үшін менен жарылқау тілеңдер, мен күнәларыңды кешіремін. Ей, құлдарым! Сендер маған ешбір пайда не болмаса зиян келтіре алмайсыңдар. Ей, құлдарым! Егер сендердің әуелгілеріңмен кейінгілерің адамдарың мен жындарың қосылып бір адамдай тақуа болса онда менің мүлкіме еш нәрсе қосылмайды. Ей, құлдарым! Егер сендердің әуелгілеріңмен кейінгілерің адамдарың мен жындарың барлығы бір адамдай күнәһәр болып кетсе менің мүлкімнен ештеңе кемімейді. Ей, құлдарым! Егер сендердің әуелгілеріңмен кейінгілерің адамдарың мен жындарың бір жерге жиналып қажеттеріңді сұрайтын болсаңдар әр пендеге сұрағанын беремін. Одан менің мүлкімнен ешнәрсе кеміп қалмайды. Ол бар болғаны теңізге инені матырып алғандай. Ей, құлдарым! Расында менің жанымда амалдарыңның есебі бар. Оларды өздеріңе қайтарамын.(яғни, істегендеріне қарай нәтижесін көресіңдер) Сол кезде жақсылыққа қол жеткізген Алла Тағалаға мақтау айтсын. Кім жамандыққа тап болса, тек өзінен көрсін. Қиямет күні әр нәрсенің ақысы қайтарылады. Мүйізі бар қошқар мүйізі жоқ қошқарды сүзген болса, олардың ақылары алынады.
Қортындылай келе! Пайғамбарымыздың (صلى الله عليه وسلم) хадисінде келген үш адамның дұғасы қабыл ата-ананың баласына қылған дұғасы жолаушының және зұлымдыққа ұшыраған адамнның дұғасы. Сол үшін біреуге зұлымдық жасаудан сақтану керек.
Ақылбеков Марлен
Талдықорған қаласы, «Жетісу» мешітінің ұстазы