{gallery}15072015{/gallery} Мұсылман қауымы айлардың сұлтаны - Рамазан, күндердің сұлтаны - Жұма, түндердің сұлтаны - Қадір түні деп есептейді. Биылғы Қадір түніне аудан мешітінің алқасы дайындық жасап, жиналған жамағаттың уақытын тиімді өткізуді мақсат тұтты.

-Отыз күн Оразаны пендесіне парыз етіп, ерте тұрғызып, ауыз бекіттіріп, кеш бата аштыруға ұмсындырған жаратушы иенің берер жақсылығы шексіз. Тек шынайы ниет етіп, жан-тәніңмен берілу қайырымды айдан мейірім күткен пенделердің еншісі,- деді осынау қасиетті түнде қарсы алуға жиналған жамағаттың алдында сөз алған аудан әкімі Ерғазы Қошанбеков. Қажылыққа барып, Мекке-Мединенің киелі табалдырығына тәу етіп қайтқан Сатыбалды қажы Малаев аудан басшысының ізгі тілегін жалғастырды. Жиналған қауымға құттықтау лебізін аудандық ардагерлер ұйымының төрағасы Қадыл Жанасбеков, аудандық әжелер алқасының төрайымы Шолпан     ортаға салды.

Ауданның бас имамы Серікбек Асқарұлы киелі күні аудандық мешітке ат басын бұрған аудан әкіміне, мекеме-ұйымдардың жетекшілеріне алғысын ақтарып, Рамазан айында жүзеге асқан ізгі шараларды өз сөзіне арқау етті.

 Дүниеге келіп, тырбанып тірлік кешкен соң біліп істейтін, білмей істейтін пендеуи күнәлардан арылуға мұрсат берген Алланың кеңдігіне қайран қалмасқа болмайды. Бұған қоса Пайғамбарымыз Мұхаммед ғалайһиуәссаламға қасиетті Құранның алғашқы сүрелері түскен  Қадір түнінің  киепеті ерекше. Алланың бізге, жер бетінде жанталаса жыбырлап, тірлік кешкен саналы ғұмыр иелеріне әр таңды жарық етіп сыйлап, әр кешті қызыл арайға шомылдыра батыруының өзі бақыт емес пе? Міне, Қадір түнін жамағатпен бірге өткізгендер осылайша діни ғибадат төңірегінде маңызды әңгімелер естіді.

Ж.Жомартұлы.