{gallery}020720150{/gallery}Міне, қасиетті Рамазан айының ортасы да болып қалды. Әлем мұсылмандары парыз оразаны ұстап, нұрлы да құтты айды айрықша құлшылықтармен, дұға-тілектермен өткізуге тырысуда.

Құдіреті күшті Алла Тағала ниет-тілектерімізді, құлшылықтарымызды қабыл етсін деп тілейміз.

Сансыз сауаптар жазылатын, әр күні жылға пара пар, Қадір түні ғасырға жуық құлшылық жасағанға тең ерекше бір ай Рамазанның алғашқы онкүндігінде Талдықорған өңіріне қарасты Ескелді аудандық мешітінде қасиетті кәлам, Құран Карим хатым етілді.

Осы мешіттің бас имамы Болат Сағынғалиұлы ыждағатты дайындығының нәтижесінде мешіт жамағаты қасиетті айдағы құлшылықтарды алаңсыз атқару үстінде.

Рамазанның әр кешінде мешітте тұрақты түрде ауызашар беріліп, түндерінде тарауих намазы оқылуда. Мешіт жамағатының ауызбіршілігі артып, құтты Рамазанның қадір-қасиетін тереңінен ұғынуға бар мүмкіндік жасалып отыр.

Қасиетті Құран Кәрімді 10 күнде толық хатым қылған Шұбайұлы Ахметжан қариға Алла разы болсын!

Құран хатымның соңғы түніндегі тарауихқа келген жамағат көз жастарына ерік берді.

Бас имам Болат Жұмағалиевтің дұға-тілегі, Ахметжан қаридың батасы көпшілікті толқытты.

Қасиетті Құран хатымның аяқталып қалуы да көңілге қимастық сезім салды.

Бұл кешке Сарқан және Панфилов аудандарынан арнайы қонақтар келді.

Мешіттегі күнделікті ауызашардың біріне Талдықорған орталық «Иман» мешітінің найб имамы Нұрлан Жұманұлы қатысып, көркем уағыз айтты.

Қасиетті айдың күндері мен түндері осылайша айтарлықтай дәрежеде өтуде.

Мүбарак Рамазандағы әрбір құлшылыққа, әрбір тілекке, әрбір жақсылыққа еселенген сауаптар жазылып, екі дүниенің игілігіне бөлене берейік!

Сөйтіп биылғы Құран хатым ескелдіктерді толғандырып қана қоймай, ойландырып тастады.

Қасиетті Құранда оқып үйренудің ауадай қажеттігін сезінді ел.

Ораза қабыл болсын!