2015 жылдың 18 МАУСЫМЫ – қасиетті Рамазан айының бірінші күні!
Мейірімді, рақымды Алланың атымен бастаймын!
ҚАСИЕТТІ РАМАЗАН ҚҰТТЫ БОЛСЫН!
Барша Жетісу жұршылығын қасиетті Рамазан айының келуімен шын жүректен құттықтаймын. Рамазан — Жаратушының мұсылман қауымына тартқан теңдессіз ұлық сыйы. Рамазан — айында жақсылықтар пенделеріне нөсерлеп жауатын ай. Рамазан —жақсылықтар мен ізгілікті амалдар сауабының еселеніп жазылатын берекелі айы. Сол себепті де ізгілікті аңсаушылар осы айдың әр күнін жақсылыққа қол жеткізу үшін ұтымды пайдаланатын болады.
Рамазан айының қадір-қасиеті мен мән-маңызы жайлы мешіттерде, бұқаралық ақпарат құралдарында айтылып та, жазылып та жүр. Аллаға шүкір, соның нәтижесінде Алла тағаланың ризашылығы үшін ораза ұстаушылар саны жылдан-жылға көбею үстінде. Бұл қасиетті айда ішіп-жеуге ғана емес, өсек-ғайбат айтпасын деп тілге, әдепсіз нәрсені көрмесін деп көзге, ондайларды естімесін, білмесін деп құлаққа, теріс нәрсені ойламасын деп ойда ораза тұтуы ләзім. Құранды көбірек оқып, зерделеп, құлшылық амалдарын неғұрлым көбірек орындаған сайын олардың сауабы да молаймақ. Сол арқылы ғана ұстаған оразамыз Алла тағала құзырында ерекше ілтипат пен құрметке ие.
Рамазан айы хақында хазіреті Мұхаммед (с.ғ.с.) пайғамбарымыздың хадис шәріпінде: «Рамазан келгенде жәннат есіктері ашылып, тозақ есіктері жабылады. Шайтандар кісенделеді», тағы бір хадисінде, «Кімде-кім рамазан айының оразасын шын иман келтіріп, ықыласпен ұстаса, оның бұрын істеген күнәлары кешіріледі», - деген.
Бұл айда мұсылмандар бірін-бірі қонаққа шақырып, ауызашар берудің, сауапқа кенелудің қызығына түседі. Дастархан басында небір ғибратты әңгімелер айтылады. Осылайша рамазан берекелі дастархан болып жайылып, әр кеші илаһи мейрамға айналады. Тарауық намазының қадір-қасиетін түсінген жамағат мешітте маңдайын сәждеге қойып, Раббысының алдында тұруға ынтығады.
Алла Тағала баршаңызды рамазан оразасын шын ынта-ықыласымен ұстаушылардан қылып, қияметте ұстаған оразаларымыздың сауабы мен сыйы еселеніп жаннаттың бақтарында болуды нәсіп етсін.
Қасиетті Рамазан айы құтты беркелі болсын!
ҚМДБ-ның Талдықорған
өңірінің өкіл имамы: Ахмадиев С.Р
