{gallery}0306{/gallery} «Бала көңілдің гүлі, көздің нұры»  - деген  жақсы сөз бар қазақта. Қазақ атамыз бала десе ішкен асын жерге қойып, барын алдына тосып, ешкімнен кем қалмай өсуіне барлық жақсы әрекеттерді жасаған. Тіпті «баламның табанына кірген шөңге менің маңдайыма кірсін» - деп баласына еш жамандықты жуытпай, қанаттыға қақтырмай, тұмсықтыға шоқтырмай өсірген.  Баланын көкке көтеріп, төрге шығарып, ерекше құрметтеген сол бабаларымыз, бала тәрбиесіне көп көңіл бөлген. Жастайынан жақсы әдеттерге баулып, өсе келе маңызды шаруаларға араластырып, өнегелі тәрбие беруге тырысқан. Баланың титтейінен тәтті қылықтарын қызықтап, жақсылықтарына қуанып, мерейлерін асырған. Бұл дүниеде сәбидің шаттық күлкісіне жетер күлкі бар ма? Сәби күлсе көңіліңіздің гүлі ашылып, көзіңіздің нұры кіріп, өміріңіз бейнебір шаттыққа толып, әсерлі күй кешетініңіз анық. Сәбилерге осындай шаттық көңіл – күй, сыңғыр күлкі, сыйлау мақсатында «1 – маусым Балалардың құқығын қорғау күні» аясында Арасан ауылының имамы Құлбеков Асхат «Балдәурен» шағын орталығының сәбилерін «Арасан – Қапал» шипажайында орналасқан ойын алаңына апарып, сәбилерге мол қуаныш сыйлады. Балалар ойын алаңын көргенде жүздері бал – бұл жайнап, ойынның қайнаған базарында асыр салып, шаттық күлкіге ерік берді. Бақша іші сәбилердің сыңғыр күлкісіне, шаттық айғайына толып кетті. Іс – шара соңына қарай имам балаларға тәттілер мен сусындар таратты. Балалар зор қуанышқа кенеліп, имамға алғыстарын жаудырды. Балалардың бал – бұл жанған жүздерін көрген тәрбиешілер Б.Т.Курпетаева, Т.А.Бектемісова, С.К.Куджайбекова, ата – аналар атынан барған Р.Ж.Ақсубаева балаларға зор қуаныш, шаттық күлкі, алаңсыз ойын, мағыналы іс – шара ұйымдастырғаны үшін имам Құлбеков Асхатқа Асхатқа ризашылықтарын білдіп, алғыстарын жаудырды. Іс – шара соңында имам естелікке балалармен, тәрбиешілермен суретке түсіп, балалармен мәз мәйрам болып, олардың тәтті күлкісіне тоймаған күйі тарқасты. «Балалы үй базар...» - демекші сәбилеріміздің бақытты базары, шаттық күлкісі, қуанған кездері тарқамасын. Алла ғұмырларын ұзақ қып, егеменді еліміздің туын желбіретер азаматтар боп өссін деген жақсы тілектеміз. Ал, сәбиелерге шаттық күлкі сыйлаған Асхат бауырымызға «Алланың нұры жауып, сізге ризашылығын төксін» дейміз!