{gallery}27052015{/gallery}27 мамыр күні Талдықорған орталық «Иман» мешітінде «Сәт сапар саған, жас түлек» атты рухани кеш ұйымдастырылды. Кешке Талдықорған қаласының 25 ке тарта орта мектеп түлектері мен ұстаздары және ата-аналар қатысты. Кездесуді ресми ашқан Талдықорған өңірінің өкіл имамы С. Ахмадиев оқушыларға насихатын айтып, ізгі тілегін жолдады. «Жақсы оймен, ізгі ниетпен болашаққа не жоспарласа да, ол ниетіне жетуге Алла жәрдемші. Мызғымас сенім, нақты жоспар болса, жете алмайтын жетістік, аса алмайтын асу жоқ» - деген сөздермен жастарды қанаттандырды.

Мешітте жыл сайынғы өтетін рухани шараның негізгі мақсаты – оқушылар үшін аса маңызды науқан – ҰБТ қарсаңында түлектерге игі тілек тілеп, рухани демеу білдіру, жігерлендіру.

ҚМДБ-нан арнайы келген РАНТ мүшесі А. Мұқанов жас түлектерге білім алудың артықшылығы, қазіргі заманда түрлі ағымдардың зияны мен зардабы, олардың жетегінде еріп кетпеуді баса айтты.

Рухани кездесу соңында Алланың қасиетті сөзінен Құран оқылып, бата алған жастар Алланың үйінен нәр алған қуанышты жүздерімен тарқасты.

Талдықорған өңірлік өкілдіктің баспасөз қызметі