ҚМДБ Жетісу облысы бойынша өкілдігінің дін қызметкерлеріне республикалық аттестаттау басталды.

Шараны жоғары деңгейде өткізу үшін құрылған аттестаттау комиссиясының құрамында ҚМДБ төрағасының орынбасары, наиб мүфти Кенжеәлі Қоңыратбайұлы, Бас мүфтидің кеңесшісі Кенжетай Байкемелұлы Дүйсенбай, Діни білім және кадр даярлау бөлімінің меңгерушісі Смайыл Сүйерқұлұлы  Сейтбеков, Шариғат және пәтуа бөлімінің маманы Медет Құрмашұлы Құрсақов, Дін істері және талдау бөлімінің маманы Махамбет Саттарұлы бар.

Аттестацияның алғашқы кезеңі компьютерлік тестілеу жүйесі бойынша өтіп жатыр. Сынақ барысында облыс имамы Керімбек Сәрсембайұлы бастаған дін қызметкерлеріне ақида, фиқһ, Ислам тарихы, әкімшілік жүйе (заң) тақырыптары бойынша сұрақтар ұсынылуда.

Екінші кезеңде имамдар ауызша сұрақ-жауап бойынша сынақ тапсыруда. 

Бұл кезеңде дін қызметкерлері қырағат, тәжуид, хадис, дін мен дәстүр және ҚМДБ бекіткен концептуалды құжаттар бойынша қойылған сұрақтарға жауап беруде.

Өтіп жатқан аттестаттаудың негізгі мақсаты – имамдардың білім деңгейін анықтап, біліктілігін арттыру.

4 күнге созылатын республикалық аттестаттауда Талдықорған, Текелі қалаларында, Алакөл, Сарқан, Ақсу, Ескелді, Көксу, Қаратал, Кербұлақ, Панфилов аудандарында жұмыс істейтін 250 дін қызметкері емтихан барысында қала, аудан және ауыл яғни, А, В және С санаттары бойынша өз білім деңгейлерін тексереді. 

Үрдіске айналған бұл игі шара имамдардың біліктілігін арттырып, ілімге деген құштарлығын оятатыны сөзсіз.