ҚМДБ жариялаған “Ислам - ынтымақ пен бірлік діні” жылы аясында он екі айдың сұлтаны болған - қасиетті Рамазан айының артықшылығын ұлықтау мақсатында облыстық “Жетісу” телеканалында жыл сайынғы үрдіс бойынша “Иман нұры” тележобасы көрерменге жол тартты. Алғашқы эфирдің шымылдығын өңірдің бас имамы Алмас Сағидоллаұлы ашып, келіп жеткен ұлық аймен жетісулық көрерменді құттықтап, “Рамазан - ихсан айы” деген тақырыпта сөз қозғады. Жүргізуші мен көрермендердің сұрағына жауап берді. Айта кетейік, бұл тележоба 1 ай бойы жалғасын табады. Арнайы жоспар бойынша өңірдің барлық имамы көрерменнің көкейтесті сұрағына жауап беретін болады.