Имамдардың білімін жетілдіру ислам институтында білім алып жатқан дін қызметкерлері халал сертификатын алған өндіріс ошақтарының жұмысымен танысып, тәжірибе алмасуы «Халал стандарттау» курсының басты бағдарламасының бірі.

Осы мақсатта Қазақстан мұсылмандары діни басқармасы «Халал өнімдерін стандарттау» бөлімінің ұйымдастыруымен Ислам институтында білім алып жатқан дін қызметкерлері «Алель Агро» ЖШС құс фабрикасының жұмысымен танысып, іс-тәжірибеден өтті.  

Шараның басты мақсаты имамдардың халал мәселесіне қатысты алған білімдерін тәжірибе жүзінде нақтылап, кәсіптік бағдар беру. Сонымен бірге, бұл игі шара ҚМДБ-ның халал сертификатын алған кәсіпорындарды бақылау жөніндегі жұмыстарды зерттеп-зерделеуге мүмкіндік берді. 

Тәжірибе барысында Халал өнімдерін стандарттау бөлімінің меңгерушісі Бейбіт Мырзагелдиев имамдарды құс фабрикасының жұмысымен таныстырып: «Соңғы уақытта елімізде халал өнімдер шығаратын кәсіпорындар саны көбейіп келеді. Бұл қуантатын жағдай. Алайда, бұл салада қадағалау, үйлестіру жұмыстарының орны өте маңызды. Әр дін маманы өнім халал шарттарына қаншалықты сай екенін ажырататын ережелер, нормативтер мен стандарттартарды теориялық және тәжірибе жүзінде де жетік білуі шарт»,-деді.

Айта кетсек, «Алель Агро» ЖШС құс фабрикасы жақында Қазақстан мұсылмандары діни басқармасының халал сертификатын алып,  халал ережесіне сай жұмыс жасап жатқан кәсіпорындардың бірі.

{gallery}30042015-2{/gallery}