Дұға-мұсылманның қаруы. Алла Тағаланың бізге берген ең үлкен сыйларының бірі десек те болады. Басқа келген қандай да бір қиыншылық болсын, я болмаса қиын жағдайда да Ұлы Раббымыздан дұға тілеу арқылы сол шиеленістен шыға аламыз.
Иә, шынайы ықыласпен жасалған әр дұғаны Алла қабыл етуші, дей тұрғанымен Ұлы Раббымызға дұғаның қабыл болуының артығырақ әрі сүйіктірек уақыттары да бар.
Ендеше дұғаның қабвл болатын уақыттарын қарастырайық:
* Түннің әуелгі, ортаңғы және соңғы бөлігіндегі дұға қабыл.
«Әр түні, түннің әуелгі үштен бір бөлігі өткенде Аллаһ Тағала аспан дүниесіне түсіп: «Мен дүниенің Патшасымын! Мен дүниенің Патша-сымын! Кім Маған дұға қылады, оның дұғасын қабыл етемін. Кім Менен қажетін сұрайды оған беремін. Кім Менен жарылқау тілесе, оны жарылқаймын.» — дейді. Осылай таң атқанша жалғасады.» (Мүслим)
Екінші бір риуаятта: «...Түннің ортаңғы немесе соңғы үштен бір бөлігінде Аллаһ Тағала аспан дүниесіне түседі,» — делінген. (Мүслим).
Ал келесі бір риуаятта: «Әр түннің соңғы үштен бір бөлігінде Раббымыз аспан дүниесіне түсіп: «Кім Маған дұға қылса, қажетін сұраса, оған беремін. Кім Менен күнәсі жарылқануын тілесе, оны жарылқаймын.» — дейді.» делінген. (Мүслим).
* Жұма күні
«Расында жұма күні – күндердің ең жақсысы және Аллаһ Тағаланың қасында ең ұлығы. Ол Аллаһ Тағалаға Ораза айт пен Құрбан айттан да абзал. Оның бес қасиеті бар:
- Жұма күні Аллаһ Тағала Адам атаны жаратты.
- Осы күні Адам ата жерге түсті.
- Жұма күні бір сағат бар, сол сағатта пенде Аллаһ Тағаладан харамнан басқа не тілесе береді.
- Жұма күні Қиямет сағаты соғады. Күллі періште, аспан, жер, жел, тау, теңіздер жұма күні Қиямет болып қала ма деп қор-қады.» (Ахмад, Ибн Мәжә).
* Имам: «Әмин! – дегендегі тілек қабыл.
«Қари: «Әмин!» — дегенде, сендер де: «Әмин!» - деңдер! Себебі періштелер де! «Әмин» — деп тұрады. Кімнің «Әмин!» — дегені періштелердің: «Әмин!» — дегенімен сәйкес келсе, оның өткен күнәлары кешіріледі.» (Бұхари)
* Парыз намазының соңы. Дәлірек айтқанда, намаздың парызы оқылып, соңғы отырыста әт-тәхият пен салауат оқылғаннан кейін, сәлем берер алдында дұға ету.
Пайғамбарымыз Мұхаммедке, салла Аллаһу алайһи уа сәлләм,: «Иә, Аллаһтың Елшісі, дұғаның қайсысы өтімдірек (яғни, қандай дұғаның қабыл болуы ықтимал)?» - делінгенде, Ол: «Түннің соңғы бөлігі мен парыз намаздың соңындағы дұға,» — деп жауап берді.» (Байһақи).
* Азан айтылғанда
«Намазға азан айтылғанда аспанның есіктері ашылып, дұға қабыл болады.» (Әт-Тәйәлиси)
* Түн бойғы тілек қабыл.
«Расында, түнде бір сағат бар. Бір мұсылман пенде Аллаһ Тағаладан дүние не Ақырет ісінің жақсылығын тілеп, дұғасы сол сағатқа сай келсе, Аллаһ Тағала тілегін береді. Ол сағат әр түнде болады.» (Мүслим, Ахмад)
* Ауру адамға барып көңілін сұрағанда
Ауру адамға барып көңілін сұрағанда немесе мәйітті зиярат еткенде.
«Сендер ауру кісінің қасында немесе жаназада болсаңдар, тек жақсылықты айтыңдар! Себебі, періштелер сендер-дің айтқандарыңа: «Әмин!» — деп тұрады». (Мүслим).
* Азан мен қаматтың арасында.
«Азан мен қаматтың арасындағы дұға қайтарылмайды.» (Әт-Термизи)
* Сәждеде жатқанда дұға қабыл.
«Пенденің Раббысына ең жақын бола-тын мезеті – сәждеде. Ендеше сәждені дұғамен көбейтіңдер!» (Мүслим).
* Шын тілегенде дұға қабыл.
«(Адамдардың) жүрегі ыдыс сияқты. Оның бірі екіншіден кеңірек болады. Ей, адамдар, егер сендер Аллаһ Тағаладан тілесеңдер шындап сұраңдар! Себебі, Аллаһ Тағала пенденің енжар, беріле сұрамаған тілегін қабыл етпейді.» (Әт-Термизи, Ахмад).
* Аллаһ Тағалаға мақтау айтып, ұлықтап әрі Пайғамбарымыз Мұхаммедке, салла Аллаһу алайһи уа сәлләм, салауат айтқанда.
* Жаңбыр жауғанда
«Дұғаларыңның қабыл болуын: әскер дұшпанмен бетпе-бет тұрғанда, намаз-ға қамат айтылғанда және жаңбыр жауғанда тілеңдер!» (Әш-Шафиғи, Әл-Байһақи).
* Әтеш шақырғанда.
«Әтеш шақырғанын естісеңдер, Аллаһ Тағаланың кеңшілігін тілеңдер! Себебі, ол періштені көрді (яғни, періштені көрсе – шақырады). Егер есектің ақырғанын естісеңдер, шай-танның азғыруынан Аллаһ Тағаладан пана тілеңдер! Себебі, ол шайтанды көрді (яғни, шайтанды көргенде ақыра-ды).» (Мүслим).
* Рамазан айында.
* Қадір түні.
* Құран оқылғанда.
Жоғарыда айтылып кеткен уақыттарда дұға тілеген абзал болады. Ендеше осы уақыттарды пайдаланып, барынша Аллаға жалбарынып, дұға етіп, Оған жақындай түсейік!
